ᱛᱳᱭᱳ ᱟᱨ ᱦᱟᱲᱟᱢ ᱵᱩᱰᱦᱤ ᱨᱮᱭᱟᱜ

 

ᱱᱚᱣᱟ ᱫᱚ ᱱᱚᱝᱠᱟ ᱞᱮᱠᱟ ᱠᱟᱱᱟ᱾ ᱥᱮᱫᱟᱭ ᱢᱟᱨᱮ ᱦᱟᱯᱲᱟᱢ ᱠᱚᱠᱚ ᱞᱟᱹᱭ ᱟᱠᱟᱫᱟ ᱟᱫᱚ ᱪᱮᱞᱮ ᱱᱤᱛᱨᱮ ᱦᱚᱸ ᱤᱱᱟᱹ ᱞᱮᱵᱮᱫ ᱞᱟᱺᱰᱦᱩ ᱛᱮᱜᱮ ᱫᱟᱨᱟᱵᱚᱱ ᱠᱟᱱᱟ᱾ ᱟᱫᱚ ᱳᱠᱳᱜᱮ ᱚᱠᱟ ᱫᱷᱟᱨᱟᱨᱮ ᱪᱚᱝ ᱞᱮᱜᱽᱪᱟᱨᱠᱚ ᱵᱟᱫᱷᱟᱣᱠᱮᱫ, ᱵᱟᱝᱫᱚ ᱫᱩᱲᱩᱵ ᱠᱟᱛᱮ ᱵᱟᱝᱫᱚ ᱛᱮᱸᱜᱳᱠᱟᱛᱮ, ᱡᱚᱛᱚ ᱟᱜ ᱜᱮ ᱥᱤᱨᱮ ᱥᱤᱨᱮ ᱯᱟᱴᱷᱮ ᱯᱟᱞᱷᱮᱠᱚ ᱞᱮᱜᱽ ᱟᱠᱟᱫ ᱪᱟᱨ ᱟᱠᱟᱫ ᱟ᱾ ᱜᱟᱢ, ᱠᱟᱦᱱᱤ, ᱠᱩᱫᱩᱢ ᱮᱢᱟᱱ ᱛᱮᱭᱟᱜᱠᱳ ᱡᱚᱲᱟᱣ ᱟᱠᱟᱫ ᱟ᱾ ᱟᱫᱚ ᱳᱱᱠᱚᱣᱟᱜ ᱱᱤᱠ ᱵᱤᱫᱤᱭᱟᱹ ᱛᱮᱜᱮ ᱱᱤᱛ ᱦᱟᱹᱵᱤᱡ ᱢᱮᱱᱟᱜ ᱦᱟᱛᱟᱲ ᱜᱮᱭᱟ᱾ ᱱᱤᱛ ᱡᱚᱲᱟᱣ ᱟᱠᱟᱫ ᱠᱟᱛᱷᱟ ᱫᱚ ᱵᱟᱝ ᱠᱟᱱᱟ᱾ ᱟᱨ ᱱᱳᱠᱳ ᱛᱳᱭᱳ ᱮᱢᱟᱱ ᱛᱮᱭᱟᱜ ᱨᱮᱭᱟᱜ ᱠᱟᱛᱷᱟ ᱦᱚᱸ ᱩᱱ ᱡᱚᱠᱷᱮᱱ ᱨᱮᱭᱟᱜ ᱠᱟᱱ ᱜᱮᱭᱟᱹ ᱟᱫᱚ ᱟᱞᱮ ᱦᱚᱲ ᱦᱚᱯᱚᱱ ᱞᱮᱠᱷᱟ ᱯᱟᱲᱦᱟᱜ ᱢᱟ ᱵᱟᱞᱮ ᱵᱟᱰᱟᱭ᱾ ᱟᱨ ᱱᱟᱹᱛᱷᱤ ᱥᱮ ᱯᱩᱛᱷᱤ ᱮᱢᱟᱱ ᱫᱚ ᱵᱟᱹᱱᱩᱜ ᱛᱟᱞᱮᱭᱟ᱾ ᱟᱫᱚ ᱮᱱᱨᱮᱦᱚᱸ ᱪᱮᱠᱟᱠᱚᱛᱮ ᱪᱚᱝ ᱱᱚᱜ ᱚᱭ ᱢᱮᱱᱟᱜ ᱜᱮ ᱛᱟᱞᱮᱭᱟ, ᱵᱟᱝ ᱟᱫ ᱟᱠᱟᱱ ᱛᱟᱞᱮᱭᱟ᱾ ᱟᱨ ᱱᱚᱣᱟ ᱚᱞᱚᱜ ᱯᱟᱲᱦᱟᱣ ᱚᱜ ᱢᱟ ᱱᱮᱠᱳ ᱥᱟᱦᱮᱵᱽ ᱦᱚᱯᱚᱱ ᱨᱟᱠᱟᱯ ᱠᱟᱛᱮ ᱥᱮ ᱱᱚᱣᱟ ᱫᱤᱥᱚᱢ ᱫᱚᱠᱷᱚᱞ ᱠᱟᱛᱮ ᱦᱚᱲ ᱦᱚᱯᱚᱱᱠᱚ ᱪᱮᱫ ᱟᱠᱟᱣᱟᱫ ᱠᱚᱣᱟ᱾ ᱟᱫᱚ ᱮᱱᱨᱮᱦᱚᱸ ᱩᱱᱟᱹᱜ ᱦᱚᱲ ᱚᱞᱚᱜ ᱯᱟᱲᱦᱟᱣ ᱠᱚ ᱪᱮᱫ ᱠᱮᱫ ᱟ᱾ ᱟᱫᱚ ᱮᱱᱨᱮᱦᱚᱸ ᱦᱚᱲ ᱦᱚᱯᱚᱱᱟᱜ ᱡᱩᱜᱽ ᱨᱮᱭᱟᱜ ᱠᱟᱛᱷᱟ ᱱᱟᱛᱷᱤ ᱫᱚᱦᱚᱠᱟᱜ ᱞᱟᱜᱟᱫ ᱫᱚ ᱚᱠᱚᱭ ᱦᱚ ᱵᱟᱝ ᱥᱟᱨᱵᱷᱟᱨᱟᱣ ᱮᱫ ᱠᱚᱣᱟ᱾ ᱟᱨ ᱤᱧ ᱦᱚ ᱥᱟᱦᱮᱵᱽ ᱧᱟᱢ ᱠᱟᱱᱛᱮ ᱢᱤᱫ ᱵᱟᱨ ᱠᱟᱛᱷᱟᱧ ᱠᱷᱮᱲᱮ ᱠᱷᱚᱲᱪᱮ ᱵᱟᱲᱟᱠᱟᱜ ᱠᱟᱱᱟ, ᱟᱨ ᱵᱟᱝᱠᱷᱟᱱ ᱚᱠᱚᱭ ᱵᱟᱰᱟᱭ ᱪᱚᱝ᱾ ᱟᱫᱚ ᱱᱚᱣᱟ ᱠᱟᱛᱷᱟ ᱰᱷᱮᱨ ᱞᱟᱪᱷᱟᱲᱛᱮ ᱪᱟᱞᱟᱣ ᱮᱱᱟ ᱛᱳᱭᱳ ᱨᱮᱭᱟᱜ ᱵᱚᱱ ᱞᱟᱹᱭ ᱟᱠᱚ ᱨᱮᱜᱮ᱾ ᱚᱱᱟ ᱫᱚ ᱱᱚᱝᱠᱟ ᱠᱟᱱᱟ᱾ 

ᱥᱮᱫᱟᱭ ᱡᱚᱠᱷᱮᱱ ᱠᱟᱛᱷᱟᱭ, ᱢᱤᱫᱴᱮᱱ ᱠᱚᱲᱟᱠᱚ ᱵᱟᱹᱦᱩ ᱟᱫᱮᱭᱟ᱾ ᱟᱫᱚ ᱡᱚᱠᱷᱮᱡ ᱡᱚᱠᱷᱮᱡᱨᱮ ᱩᱱᱠᱤᱱ ᱠᱩᱲᱤ ᱠᱚᱲᱟ ᱫᱚ ᱥᱮ ᱦᱟᱲᱟᱢ ᱵᱩᱰᱦᱤ ᱫᱚ ᱱᱟᱹᱭᱦᱟᱹᱨᱠᱤᱱ ᱦᱤᱡᱩᱜ ᱥᱮᱱᱚᱜ ᱟ᱾ ᱢᱤᱫ ᱫᱤᱱ ᱩᱱᱠᱤᱱ ᱫᱚ ᱱᱟᱹᱭᱦᱟᱹᱨ ᱠᱷᱚᱱᱠᱤᱱ ᱦᱤᱡᱩᱜᱠᱟᱱ ᱛᱟᱦᱮᱸ ᱠᱟᱱᱟ᱾ ᱩᱱᱤ ᱠᱩᱲᱤ ᱫᱚ ᱛᱟᱵᱮᱱ ᱠᱷᱟᱹᱡᱟᱹᱲᱤᱠᱚ ᱢᱳᱴᱨᱟ ᱜᱚᱫ ᱟᱠᱟᱶ ᱟᱫᱮᱭᱟ᱾ ᱚᱱᱟ ᱫᱚ ᱧᱮᱞ ᱫᱟᱱᱟᱨᱟᱢ ᱥᱟᱸᱫᱮᱥ ᱠᱚ ᱢᱮᱛᱟᱜ ᱟ᱾ ᱟᱨ ᱥᱮᱫᱟᱭ ᱡᱚᱠᱷᱮᱱ ᱥᱩᱱᱩᱢ ᱟᱥᱮᱱ ᱞᱟᱜᱟᱫ ᱵᱚᱛᱚᱞ ᱪᱚᱞᱚᱱ ᱢᱟ ᱵᱟᱝ ᱛᱟᱦᱮᱸᱠᱟᱱ; ᱢᱟᱭᱡᱤᱭᱩᱠᱚ ᱞᱟᱜᱟᱫ ᱫᱚ ᱠᱩᱯᱤ ᱥᱩᱱᱩᱢ ᱟᱨ ᱦᱮᱨᱮᱞ ᱦᱚᱯᱚᱱᱠᱚ ᱞᱟᱜᱟᱫ ᱫᱚ ᱢᱟᱫ ᱴᱷᱚᱸᱜᱟ, ᱱᱚᱣᱟᱠᱤᱱ ᱪᱚᱞᱚᱱ ᱛᱟᱦᱮᱸᱠᱟᱱᱟ᱾ ᱟᱨ ᱱᱤᱛ ᱠᱟᱛᱮ ᱫᱚ ᱵᱳᱛᱳᱞ ᱠᱚ ᱪᱚᱞᱚᱱ ᱟᱠᱟᱫᱟ᱾ ᱱᱚᱣᱟ ᱫᱚ ᱥᱟᱦᱮᱵᱽ ᱦᱚᱯᱚᱱ ᱨᱟᱠᱟᱯ ᱠᱟᱛᱮ ᱪᱚᱞᱚᱱ ᱟᱠᱟᱱᱟ᱾ ᱟᱫᱚ ᱚᱱᱟ ᱠᱩᱯᱤ ᱪᱩᱠᱟᱹᱜ ᱛᱟᱦᱮᱸᱠᱟᱱ ᱡᱚᱠᱷᱮᱡ ᱨᱮᱭᱟᱜ ᱠᱟᱛᱷᱟ ᱠᱟᱱᱟ ᱱᱚᱣᱟ ᱫᱚ ᱾ 

ᱟᱫᱚ ᱩᱱᱨᱮ ᱩᱱᱤ ᱠᱩᱲᱤ ᱫᱚ ᱚᱱᱟ ᱛᱟᱵᱮᱱ ᱠᱷᱟᱹᱡᱟᱹᱲᱤ ᱢᱳᱴᱨᱟ ᱫᱚᱭ ᱫᱤᱯᱤᱞ ᱟᱠᱟᱫᱟ ᱟᱨ ᱠᱩᱯᱤ ᱥᱩᱱᱩᱢ ᱪᱩᱠᱟᱹᱜ ᱫᱚᱭ ᱛᱮᱶᱮᱧ ᱟᱠᱟᱫᱟ ᱟ᱾ ᱟᱨ ᱱᱟᱹᱭᱦᱟᱹᱨ ᱠᱷᱚᱱ ᱡᱟᱶᱟᱭ ᱚᱲᱟᱜ ᱛᱮ ᱥᱮ ᱩᱱᱤ ᱠᱚᱲᱟᱣᱟᱜ ᱚᱲᱟᱜ ᱛᱮᱠᱤᱱ ᱪᱟᱞᱟᱜ ᱠᱟᱱᱟ᱾ ᱩᱱᱨᱮ ᱠᱚᱲᱟ ᱫᱚ ᱞᱟᱦᱟ ᱞᱟᱦᱟᱛᱮᱭ ᱪᱟᱞᱟᱜ ᱠᱟᱱᱟ ᱟᱨ ᱠᱩᱲᱤ ᱫᱚ ᱛᱟᱭᱚᱢ ᱛᱟᱭᱢᱛᱮ᱾ ᱟᱫᱚ ᱢᱤᱫᱴᱟᱝ ᱛᱚᱯᱚᱞ ᱴᱷᱮᱱ ᱠᱩᱲᱤ ᱫᱚᱭ ᱟᱬᱜᱳ ᱟᱠᱟᱱ ᱡᱚᱠᱷᱮᱱ ᱜᱮ, ᱠᱟᱛᱷᱟᱭ, ᱵᱷᱩᱛ ᱫᱚ ᱚᱠᱟ ᱥᱮᱱ ᱠᱷᱚᱱ ᱪᱚᱭ ᱳᱰᱳᱠ ᱜᱚᱫ ᱮᱱᱟ ᱚᱱᱠᱟ ᱦᱚᱲ ᱪᱷᱤᱱ ᱞᱮᱠᱟᱛᱮ, ᱟᱨ ᱩᱱᱤ ᱠᱩᱲᱤ ᱛᱟᱭᱚᱢ ᱛᱟᱭᱚᱢ ᱛᱮᱜᱮᱭ ᱥᱮᱱ ᱤᱫᱤᱜ ᱠᱟᱱᱟ᱾ ᱟᱨ ᱠᱩᱲᱤ ᱫᱚᱭ ᱢᱮᱱᱮᱫ ᱟ, ᱳᱠᱟᱛᱮ ᱪᱚᱝ ᱱᱩᱭ ᱦᱚᱸᱭ ᱪᱟᱞᱟᱜ ᱦᱚᱲ ᱠᱟᱱᱜᱮᱭᱟ ᱪᱮᱞᱮ᱾ ᱳᱱᱟᱛᱮ ᱪᱮᱫᱦᱚᱸ ᱵᱟᱭ ᱢᱮᱛᱟᱭ ᱠᱟᱱᱟ ᱟᱨ ᱵᱟᱭ ᱠᱩᱞᱤ ᱵᱟᱲᱟᱭᱮᱫᱮ ᱠᱟᱱᱟ᱾ ᱟᱨ ᱵᱮᱞᱟ ᱫᱚ ᱦᱟᱹᱥᱩᱨᱚᱜ ᱞᱟᱜᱟᱫ ᱵᱟᱨ ᱰᱟᱝ ᱜᱟᱱ ᱢᱮᱱᱟᱭᱟᱹ ᱤᱱᱟᱹ ᱚᱠᱛᱮ ᱡᱚᱠᱷᱮᱱ᱾ 

ᱠᱷᱟᱱᱜᱮ ᱩᱱᱤ ᱠᱚᱲᱟ ᱫᱚ ᱪᱮᱠᱟ ᱠᱚᱛᱮ ᱪᱚᱭ ᱵᱮᱸᱜᱮᱫ ᱨᱩᱣᱟᱹᱲ ᱞᱮᱫ ᱫᱚᱭ ᱧᱮᱞᱠᱮᱫᱮ ᱫᱚᱹ ᱟᱡ ᱵᱟᱹᱦᱩ ᱛᱟᱭᱚᱢ ᱛᱟᱭᱚᱢᱛᱮ ᱢᱤᱫ ᱦᱚᱲᱮ ᱪᱟᱞᱟᱜ ᱠᱟᱱᱟ᱾ ᱠᱷᱟᱱ ᱜᱮᱭᱮ ᱛᱮᱸᱜᱳᱭᱮᱱᱟ᱾ ᱟᱫᱚ ᱡᱮᱢᱚᱱ ᱩᱱᱤ ᱠᱚᱲᱟᱭ ᱛᱮᱸᱜᱳᱭᱮᱱᱟ, 

ᱛᱮᱢᱚᱱ ᱠᱷᱟᱱᱜᱮ ᱵᱷᱩᱛ ᱫᱚ ᱩᱱᱤ ᱩᱩᱲᱤᱭᱮ ᱚᱨ ᱨᱩᱣᱟᱹᱲ ᱮᱫᱮ ᱠᱟᱱᱟ᱾ ᱠᱷᱟᱱᱜᱮ ᱩᱱᱤ ᱠᱚᱲᱟ ᱫᱚ ᱴᱷᱮᱸᱜᱟ ᱮᱯᱮᱞ ᱠᱟᱛᱮᱭ ᱧᱤᱨ ᱦᱮᱡ ᱜᱚᱫ ᱮᱱᱟ᱾ ᱟᱨᱮ ᱨᱩᱦᱮᱫ ᱜᱚᱫ ᱠᱮᱫᱮᱭᱟ ᱤᱧᱨᱮᱱ ᱦᱚᱲ ᱪᱮᱫ ᱤᱭᱟᱹᱛᱮᱢ ᱡᱚᱴᱮᱫ ᱠᱮᱫᱮᱭᱟ? ᱱᱤᱛ ᱜᱮᱞᱟᱜ ᱫᱟᱞ ᱜᱚᱡ ᱩᱛᱟᱹᱨ ᱢᱮᱭᱟ᱾ ᱟᱫᱚ ᱵᱷᱩᱛᱮ ᱢᱮᱱᱠᱮᱫᱟ, ᱱᱩᱭ ᱢᱟ ᱤᱧᱨᱮᱱ ᱦᱚᱲ ᱠᱟᱱᱮ, ᱟᱨ ᱟᱢ ᱢᱟᱢ ᱯᱮᱲᱟ ᱦᱚᱲ ᱠᱟᱱ᱾ ᱚᱱᱟᱛᱮ ᱟᱢ ᱢᱟ ᱞᱟᱦᱟᱛᱮᱢ ᱪᱟᱞᱟᱜ ᱠᱟᱱ, ᱱᱩᱭ ᱢᱟᱢ ᱵᱟᱹᱜᱤᱭᱟᱭ ᱠᱟᱱ᱾ ᱡᱩᱫᱤ ᱟᱢᱨᱮᱱ ᱦᱚᱲᱮ ᱛᱟᱦᱮᱱ ᱛᱟᱢᱠᱷᱟᱱᱤ ᱵᱟᱢ ᱥᱚᱛᱳᱜ ᱠᱮᱭᱟ? ᱧᱮᱞᱢᱮ, ᱤᱧᱫᱚ ᱤᱧᱨᱮᱱ ᱦᱚᱲ ᱤᱧᱛᱮᱧ ᱥᱚᱛᱳᱜ ᱟᱠᱟᱫᱮᱭᱟ᱾ ᱟᱫᱚ ᱚᱨᱮ ᱵᱟᱝᱠᱷᱟᱱ ᱤᱧ ᱪᱮᱠᱟᱭᱮᱭᱟ ᱮ ᱟᱢ ᱫᱚ ᱚᱠᱟᱛᱮ ᱪᱚᱢ ᱪᱟᱞᱟᱜ ᱠᱟᱱ ᱫᱳ ᱪᱟᱞᱟᱜ ᱢᱮ᱾ ᱱᱩᱭ ᱫᱚ ᱤᱧ ᱚᱲᱟᱜ ᱛᱮᱧ ᱤᱫᱤᱭᱮ ᱞᱟᱜᱟᱫ᱾  

ᱟᱫᱚ ᱚᱱᱠᱟ ᱢᱮᱱᱠᱟᱛᱮ ᱠᱚᱲᱟ ᱦᱚᱸ ᱢᱤᱫ ᱛᱤ ᱥᱳᱯᱳᱭ ᱥᱟᱯ ᱟᱠᱟᱫᱮᱭᱟ ᱟᱨ ᱱᱩᱭ ᱵᱷᱩᱛ ᱦᱚᱸ ᱢᱤᱫ ᱛᱤ ᱥᱳᱯᱳᱭ ᱥᱟᱯ ᱟᱠᱟᱫᱮᱭᱟ᱾ ᱩᱱᱤ ᱦᱚᱸ ᱚᱱᱛᱮᱭ ᱚᱨᱮ ᱠᱟᱱᱟᱤ ᱱᱩᱭ ᱦᱚᱸ ᱱᱚᱛᱮᱭ ᱚᱨᱮ ᱠᱟᱱᱟ᱾ ᱟᱫᱚ ᱩᱱ ᱡᱚᱠᱷᱮᱱ ᱩᱱᱤ ᱠᱩᱲᱤ ᱫᱚᱭ ᱦᱚᱦᱚ ᱠᱮᱫᱟ, ᱫᱮᱞᱟ ᱵᱟᱵᱟ, ᱦᱚᱨᱛᱮᱱᱠᱚᱱ ᱵᱤᱨᱛᱮᱱ ᱠᱚ, ᱡᱟᱸᱦᱟᱭ ᱢᱮᱱᱟᱜᱯᱮ ᱠᱷᱟᱱ, ᱦᱤᱡᱩᱜ ᱛᱮ ᱫᱳᱜ ᱠᱟᱹᱧ ᱯᱮ, ᱟᱨ ᱵᱟᱝᱠᱷᱟᱱ ᱤᱧ ᱫᱚᱠᱤᱱ ᱪᱤᱨᱟᱹ ᱡᱚᱢᱮᱧ ᱠᱟᱱᱟ᱾ 

ᱟᱫᱚ ᱩᱱ ᱡᱚᱠᱷᱮᱱᱜᱮ, ᱠᱟᱛᱷᱟᱡ, ᱛᱳᱭᱳ ᱫᱚ ᱚᱠᱟ ᱥᱮᱱ ᱪᱚᱝ ᱟᱹᱛᱤᱧ ᱮ ᱪᱟᱞᱟᱜ ᱠᱟᱱ ᱛᱟᱦᱮᱸ ᱠᱟᱱᱟ᱾ ᱟᱫᱚ ᱩᱱᱤᱭᱮ ᱦᱚᱦᱚᱠᱮᱫ ᱠᱷᱟᱱ, ᱳᱱᱟ ᱟᱸᱡᱚᱢᱛᱮ ᱛᱳᱭᱳ ᱫᱚᱭ ᱧᱤᱨ ᱦᱮᱡ ᱜᱚᱫ ᱮᱱᱟ᱾ ᱟᱫᱚᱭ ᱢᱮᱱᱜᱚᱫ ᱠᱮᱫᱟ, ᱪᱮᱫᱟᱜ ᱪᱮᱫᱟᱜ, ᱪᱮᱫᱟᱜ ᱯᱮ ᱴᱟᱱᱟ ᱴᱟᱹᱱᱤᱜ ᱠᱟᱱᱟ ?

ᱟᱫᱚ ᱩᱱᱤ ᱦᱚᱲ ᱠᱚᱲᱟᱭ ᱢᱮᱱᱜᱚᱫ ᱠᱮᱫᱟ, ᱱᱩᱭ ᱠᱩᱲᱤ ᱫᱚᱭ ᱤᱧ ᱵᱟᱹᱦᱩ ᱠᱟᱱᱟ, ᱤᱧ, ᱚᱲᱟᱜ ᱛᱮᱧ ᱤᱫᱤᱭᱮᱫᱮ ᱠᱟᱱᱟ, ᱱᱟᱹᱭᱦᱟᱹᱨ ᱠᱷᱚᱱᱞᱤᱧ ᱦᱤᱡᱩᱜ ᱠᱟᱱᱟ᱾ ᱟᱫᱚ ᱱᱩᱭ ᱤᱭᱟᱹ ᱥᱟᱞᱟ ᱫᱚ ᱚᱠᱟ ᱠᱷᱚᱱ ᱪᱚᱭ ᱳᱰᱳᱠ ᱜᱚᱫ ᱮᱱᱛᱮ ᱤᱧ ᱵᱟᱹᱦᱩ ᱫᱚᱭ ᱚᱨ ᱨᱩᱭᱟᱹᱲᱮᱫᱮ ᱠᱟᱱᱟ᱾ 

ᱠᱷᱟᱱᱜᱮ ᱩᱱᱤ ᱵᱷᱩᱛᱮ ᱢᱮᱱᱜᱚᱫ ᱠᱮᱫᱟ, ᱵᱟᱝ ᱟ, ᱱᱩᱭ ᱠᱚᱲᱤ ᱫᱚᱭ ᱤᱧ ᱵᱟᱹᱦᱩ ᱠᱟᱱᱟ, ᱚᱱᱟ ᱤᱭᱟᱹᱛᱮ ᱤᱧ ᱫᱚ ᱥᱳᱛᱳᱜ ᱠᱟᱛᱮᱧ ᱦᱤᱡᱩᱜ ᱠᱟᱱᱟ, ᱵᱟᱧ ᱵᱟᱹᱜᱤᱭᱟᱭ ᱠᱟᱱᱟ᱾ ᱟᱨ ᱱᱩᱭ ᱤᱭᱟᱹ ᱥᱟᱞᱟᱜᱮ ᱟᱹᱞᱤᱧ ᱞᱟᱦᱟ ᱞᱟᱦᱟᱛᱮ ᱳᱠᱟᱛᱮ ᱪᱚᱭ ᱪᱟᱞᱟᱜᱠᱟᱱ ᱛᱟᱦᱮᱸᱠᱟᱱ᱾ ᱟᱫᱚᱪ ᱟᱹᱞᱤᱧᱼᱮ ᱧᱮᱞ ᱠᱮᱫᱞᱤᱧ ᱠᱷᱟᱱ ᱫᱚ, ᱴᱷᱮᱸᱜᱟ ᱮᱯᱮᱞ ᱠᱟᱛᱮᱭ ᱧᱤᱨ ᱦᱮᱡ ᱜᱚᱫ ᱮᱱᱟ, ᱟᱫᱚ, ᱤᱧ ᱮ ᱫᱷᱚᱢᱠᱟᱣᱭᱮᱫᱤᱧ ᱠᱟᱱᱟ᱾ ᱟᱨ ᱤᱧ ᱵᱟᱹᱦᱩ ᱥᱳᱯᱳᱨᱮ ᱥᱟᱯ ᱠᱟᱛᱮᱭ ᱚᱨᱮ ᱠᱟᱱᱟ᱾ ᱟᱫᱚ ᱪᱟᱜ ᱤᱧ ᱤᱫᱤ ᱚᱪᱚ ᱟᱭᱟ᱾ ᱟᱫᱚ ᱱᱤᱭᱟᱹ ᱠᱟᱨᱚᱱ ᱛᱮᱜᱮᱞᱮ ᱴᱟᱱᱟ ᱴᱟᱹᱱᱤᱜ ᱠᱟᱱᱟ᱾ ᱟᱫᱚ ᱠᱷᱟᱱᱜᱮ ᱛᱳᱭᱳᱭ ᱢᱮᱱᱠᱮᱫᱟ, ᱦᱟᱯᱮ, ᱟᱞᱚᱯᱮ ᱴᱟᱱᱟ ᱴᱟᱹᱱᱤᱜ ᱟ᱾ ᱵᱤᱪᱟᱹᱨ ᱞᱮᱜᱮᱵᱚᱱ᱾ ᱟᱫᱚ ᱩᱱᱤ ᱛᱳᱭᱳᱭ ᱵᱩᱡᱷᱟᱹᱣ ᱠᱮᱫᱟ, ᱢᱤᱫ ᱫᱚᱭ ᱵᱷᱩᱛ ᱠᱟᱱᱟ ᱢᱮᱱᱛᱮ᱾ ᱠᱷᱟᱱᱜᱮ ᱛᱳᱭᱳ ᱫᱚ ᱠᱩᱲᱤᱭᱮ ᱢᱮᱛᱟᱫᱮᱭᱟ, ᱳᱱᱟ ᱛᱤᱨᱮ ᱫᱚ ᱪᱮᱫᱮᱢ ᱛᱮᱣᱮᱧ ᱟᱠᱟᱫᱟ᱾ ᱫᱮᱥᱮᱧ ᱧᱮᱞ ᱛᱟᱢᱟ᱾ ᱟᱫᱚᱭ ᱮᱢᱟᱫᱮᱭᱟ᱾ ᱛᱳᱭᱳ ᱫᱚ ᱚᱱᱟ ᱠᱩᱯᱤ ᱨᱮᱭᱟᱜ ᱥᱩᱱᱩᱢᱮ ᱫᱩᱞ ᱜᱤᱰᱤ ᱠᱟᱜ ᱛᱮ ᱪᱩᱠᱟᱹᱜ ᱫᱚ ᱠᱩᱲᱤᱜᱮᱭ ᱮᱢᱟᱫᱮᱭᱟ᱾ ᱟᱫᱚ ᱛᱳᱭᱳᱭ ᱢᱮᱱᱠᱮᱫᱟᱹ ᱡᱟᱦᱟᱸᱭᱜᱮ ᱱᱚᱣᱟ ᱪᱩᱠᱟᱹᱜ ᱨᱮᱵᱮᱱ ᱵᱚᱞᱚ ᱫᱟᱲᱮᱭᱟᱜ ᱩᱱᱤᱜᱮ ᱱᱩᱭ ᱠᱩᱲᱤ ᱫᱚᱭ ᱦᱟᱛᱟᱣ ᱮᱭᱟ᱾ ᱟᱨ ᱚᱠᱚᱭ ᱵᱟᱭ ᱵᱚᱞᱚ ᱫᱟᱲᱮᱭᱟᱜ ᱦᱚᱲ ᱫᱚ ᱵᱟᱭ ᱧᱟᱢᱮᱭᱟ᱾ 

ᱠᱷᱟᱱᱜᱮ ᱵᱷᱩᱛ ᱫᱚᱭ ᱢᱮᱱ ᱜᱚᱫᱠᱮᱫᱟ, ᱟᱪᱪᱷᱟ, ᱵᱮᱥ ᱜᱮ᱾ ᱫᱮ ᱦᱳ, ᱛᱚᱵᱮ ᱵᱚᱞᱚᱜ ᱛᱟᱞᱟᱝ ᱢᱮ᱾ 

ᱟᱫᱚ ᱩᱱᱤ ᱦᱚᱲ ᱠᱚᱲᱟ ᱫᱚᱭ ᱢᱮᱱᱠᱮᱫᱟ, ᱚᱦᱚᱧ ᱵᱚᱞᱚ ᱞᱮᱱᱟ᱾ ᱟᱨ ᱩᱱᱤ ᱵᱷᱩᱛ ᱫᱚ ᱯᱷᱩᱡ ᱢᱮᱱᱚᱛᱮᱭ ᱵᱚᱞᱚ ᱜᱚᱫ ᱮᱱᱟ᱾ ᱟᱫᱚ ᱡᱮᱢᱚᱱᱮ ᱵᱚᱞᱚ ᱜᱚᱫ ᱞᱮᱱᱟ, ᱛᱮᱢᱚᱱᱜᱮ ᱠᱤᱱ ᱠᱤᱞᱟᱯ ᱮᱥᱮᱫ ᱜᱚᱫ ᱠᱮᱫᱮᱭᱟ᱾ ᱟᱨᱮ ᱢᱮᱛᱟᱫ ᱠᱤᱱᱟ, ᱱᱚᱣᱟ ᱪᱩᱠᱟᱹᱜ ᱫᱚ ᱟᱞᱚᱵᱮᱱ ᱤᱫᱤᱭᱟ, ᱱᱚᱛᱮ ᱵᱟᱲᱮ ᱜᱤᱰᱤᱱᱠᱟᱜᱵᱮᱱ᱾ 

ᱟᱫᱚ ᱥᱟᱹᱨᱤ ᱚᱸᱰᱮ ᱜᱮᱠᱤᱱ ᱵᱟᱹᱜᱤᱭᱟᱫ ᱛᱮ ᱟᱹᱠᱤᱱ ᱫᱚᱠᱤᱱ ᱪᱟᱞᱟᱣ ᱮᱱᱟ᱾ ᱟᱫᱚ ᱯᱷᱟᱨᱟᱠ ᱧᱚᱜ ᱥᱮᱱᱠᱟᱛᱮ ᱛᱳᱭᱳᱠᱤᱱ ᱦᱚᱦᱚ ᱟᱫᱮᱛᱮ ᱛᱟᱵᱮᱱ ᱠᱤᱱ ᱮᱢᱟᱫᱮᱭᱟ᱾ 

ᱟᱫᱚ ᱮᱱᱮ ᱱᱤᱭᱟᱹ ᱠᱟᱛᱷᱟ ᱦᱚᱸᱧ ᱢᱩᱪᱟᱹᱫ ᱠᱮᱫᱟ᱾